'Narvaez' bildumako fosilen erakusketa ikusgai Ibarraundin

Ibarraundi museoan, 'Narvaez' bilduko fosil batzuk jarrita daude dagoeneko.

Jesus Mari Narvaezek eta Esperanza Azkarragak urteetan zehar bildutako fosilak 110 milioi urte atzera garamatzaten Mutrikuko Flysch beltzean aurkitutako amoniteak dira (antzinako itsaso zabal eta sakonetan bizi ziren barraskilo itxurako izakiak), eta ekainaren 28tik aurrera Eskoriatzako Ibarraundi museoan bildumaren zati bat ikusteko aukera izango da.

Narvaezen eta Azkarragaren bilduma bi zatitan banatzen da: zati bat Nautilus Mutrikuko Ikasgune Geologikoan dago ikusgai eta beste zatia Eskoriatzara ekarri berri dute. Ibarraundin, forma eta tamaina askotariko 70 pieza inguru izango dira ikusgai hilaren amaieratik aurrera. "Fosilen forma eta tamaina batzuk ikusgarriak dira, eta oso gutxitan ikusten dira horrelakoak", adierazi du Ibarraundi museoko Nerea Arana teknikariak.

Forma askotariko amoniteak

Jesus Mari Narvaezek eta Esperanza Azkarragak hainbat fosil batu dituzte 30 urteotan, eta, hala izan ez balitz, itsasoaren higadurak desegingo zuen ondare paleontologiko hau. 1975. urtetik aurrera aritu dira Mutrikuko itsaslabarretan agerian geratzen ziren amoniteen maskor  handiak harroketatik atera, berreskuratu eta gordetzen. Milioika urtetako eboluzioan forma askotako maskorrak garatu zituzten amoniteek, eta argi eta garbi ikus daiteke hori erakusketan.

Jaietatik aurrerako ordutegia

Aurrez aipatu bezala, erakusketa 18:00etan zabalduko da ekainaren 28an, baina erakusketak irekita jarraituko du jaien ondoren. Ordutegia honako hau izango da: goizetan 12:00etatik 14:00etara eta arratsaldeetan 18:00etatik 20:00etara.

Gonbidapena Ibarraunditik

Erakusketaren irekiera ofizialean Udaleko ordezkariak izango dira, eta, bestalde, herritar guztiei gonbidapena bidali nahi izan diete Ibarraunditik bertara gerturatzeko. "Herritar guztiak gonbidatu gura ditugu bilduma hau ikustera. Egunero ez da-eta halako bilduma bat ikusten".

QR-aren aukera

Edukiak QR-tan jasota egongo dira eta nahi duenak Ibarraundin izango diren tabletak erabili ahal izango ditu edukiak irakurtzeko.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.