Hitzaldi hauetan, sistema berriaren nondik norakoak azalduko zaizkie herritarrei, eta, bide batez, edukiontzi organikoaren (edukiontzi marroia) erabilpenaren jarraipena egiteko txipak jaso ahalko dira. Bestalde, herritarrek beraien ekarpenak egin ahalko dituzte sistema hobetze aldera, eta dituzten zalantzak argitu ahalko dituzte.
Bost edukiontzi, bat itxita
Asteko edozein egun eta edozein ordutan bota ahalko dira hondakinak, beira izan ezik. Sortzen duen zaratarengatik, egunez bota beharko da. Edukiontzi guztiak irekita egongo dira, edukiontzi organikoa izan ezik; hau itxita egongo da, herritarrek egiten duten erabilpenaren jarraipena egin gura delako. Horretarako, txipdun sistema erabiliko da.
Herri barruan hamasei puntu ezberdinetan jarriko dira edukiontzi berriak, baita Elorretan eta Kuatruenan ere, eta konpost-guneak gaur egun dauden lekuetan mantenduko dira: Intxaurtxueta, Dorleta, Aranburuzabala, eta Elorreta auzoetan.
Elizateetan, aldiz, gaur egun duten sistema berarekin jarraituko dute. Hainbat gune daude auzo ezberdinetan, eta baserri bakoitzak bere giltzarekin edukiontziak zabaltzeko aukera izango du. Konpost-guneari dagokionez, indibidualarekin jarraituko dute.
Komertzioak, berdin
Sistema berriak sortu ditzakeen arazoak saihesteko, eta aldaketa progresiboki egiteko, komertzioek gaur egun duten sistema berarekin jarraituko dute. Kasu honetan, irailean aldatuko zaizkie hondakinak biltzeko metodoa.