Bi partiduak irabazi dituzte Eskoriatzako neskek saskibaloian

Eskoriatzako taldearen senior mailako atzoko partiduan

Senior mailakoek 30-25 irabazi diote Errenteriako Grupo EME Oiarso taldeari eta kadete mailakoek 38-19 Azpeitiari. Kadeteek ez dute partidurik galdu denboraldi honetan. Partidu biak Eskoriatzako Manuel Muñoz kiroldegian izan dira.

Senior taldekoek atzo, egubakoitza, iluntzean jokatu zuten Errenteriako taldearen aurka. Partiduaren lehen bi laurdenak oso berdinduak izan ziren. Hirugarrenean bost puntu aurretik jarri ziren kanpotarrak eta laugarrenean markagailuari buelta eman eta aurrea hartu zuten etxekoek; 30-25 bukatu zen partidua.

Kadete mailako taldeak, berriz, gaur, zapatua, arratsaldean jokatu du Azpeitiaren kontra. Oso partidu parekatua izatea espero zuten etxekoek, bi taldeak partidurik galdu gabe zeudelako. Baina 7-14 galtzen ibili ostean, 19-0-ko partziala egin dute Fernando Rasoren jokalariek eta 38-19 izan da partiduko azken emaitza. "Urrian hasi zen denboraldia eta oraindik ez dugu partidurik galdu. Gaurkoa irabazi ostean, gainera, Azpeitiaren aurretik gaude sailkapenean. Oso pozik gaude", adierazi du Rasok.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.