Orain arte zain egon dira obrako langileak konponketa lanak egiten jarraitzeko; harginek piezak egin arte itxaron behar izan dute. "Dekorazio harri batek 200 kilo inguru ditu, eta gurutzea kendu beharko dugu hori jartzeko…", azaldu du obrak egiten diharduen Ramel enpresako arduradunak. "Hau egiteko aldamio handiago bat jarri dugu, baina 50 metroko garabi bat ere erabiliko dugu".
Astelehenerako edo martitzenerako amaituko duten aurreikuspena dute obraren arduradunek, baina egun batzuk gehiago egongo dira bertan, bide batez, San Pedro parrokiak eskatuta, garbiketa lanak egiteko.
Errepidea itxita
Aste honetako lanen berezitasunak errepidea moztea ekarriko du eguenean eta egubakoitzean. Hain zuzen, azaroaren 12an eta 13an, elizako zubitik Arbiñosteko irteeraraino bidea itxi egingo dute ibilgailuendako.
Goizeko zortzietatik arratsaldeko seietara itxiko dute bi egunetan, eta gauetan, berriz, irekita izango dute errepidea ibilgailuek. Bada, egun horietan, Arrasateko noranzkoan doazen ibilgailuek Dorleta auzotik joan beharko dute.