Zozketan derrigorrezkoa izango da Gipuzkoako Ehiza Federaziotik bidalitako zozketa txartela aurkeztea, eta pertsona bakoitzak txartel bat bakarrik aurkeztu ahal izango du. Joaten denak postu bat bakarrik eskura dezake, eta baliteke postu barik geratzea, gainera, jende kopuru handia izaten da-eta bertan. Bestalde, zozketarako prezioak askotarikoak izaten dira; bazkide direnentzat, erretiratuentzat, federatuentzat…
Ehiza postuak prest
Aldaype elkarteak 168 ehiza postu kudeatzen ditu, eta bi eremutan banatzen dira: batetik, Lete, Apotzaga, Marin… auzo inguruan dauden 95 postuak; eta bestetik, Aizkorri Aratz parkean, Alabita-Aranguren bitartean dauden 73 postuak.
Zozketan eremu bat edo bestea aukeratu beharko du ehiztariak, eta zortea izan postu bat tokatzeko eta, bide batez, ehizarako ona izateko.