Kalte horien berri eman zuen herritarrak ezin izan zuen bi gizonen autoaren matrikula hartu, baina berriz bueltatuko zirela entzun zien. Iñaki Sagredoren esanetan: "50 zulo inguru aurkitu ditugu gaztelua zegoen aurreko zaintza-dorrea zenaren gainean, eta Erdi Aroko metal asko eraman dute". Indusketen arduradunak azaldu duenez, aztarnategian ez dira zuloak ageri, baina ez daude guztiz ziur; izan ere, zuloak tapa ditzakete kalteak eragin dituztenek.
Bi urte barru hasi behar zuten haitz horretan lanean, baina, kalteen ondorioz, datorren urtean hasiko dira, ahal duten guztia salbatzeko lanak egiten. "Garai hartako iltzeak aurkitu eta eramaten badituzte, esaterako, gure lana zapuzten dute. Izan ere, metro karratu bakoitzean dauden iltzeen arabera zer-nolako eraikina zegoen… jakin dezakegu. Dena den, lurra mugituta bakarrik ere informazio pila bat galtzen da".
Ezer lortu barik, historia galduz
"Piezak museo batera eraman behar dira, eta zaharberritu. Detektagailuekin ibiltzen diren bildumagileek ez dakite hori egiten, eta etxean gordetzen dituzte", adierazi du Sagredok.
Ibarraundi museoa ere ekintzen kontra azaldu da: "Detektagailuekin indusketetan aritzea debekatuta dago. Gainera, zerbait aurkitzen duenak ezin du etxera ezer eraman, aurkitzen dena ondare publikoaren parte delako".