Lasterketan, Apotzaga auzotik Intxaurtxueta auzorainoko 1,4 kilometroko jaitsiera egingo dute pilotuek, eta bertan, drift trike, pneumatikoak, arinak, errodamenduak… mota guztietako goitibeherak ikusi ahal izango dira.
Euskal Ligarako puntuagarria izango da lasterketa, dagoeneko erabakita egon arren irabazleak zeintzuk izango diren. Jokin Gutierrez eta Aitor Zabaleta –auto pilotu ezagunaren semea– dira Euskal Ligako txapeldunak. Hala eta guztiz ere, zapatuko lasterketan egongo dira ikuskizuna ematen. Bestalde, Euskal Ligan lehian ari diren Eskoriatzako hamar pilotu inguru ere izango dira bertan, sailkapenean aurrera egiteko denbora onenak lortzeko helburuarekin.
Eskoriatzako Goitibehera Zaleak taldeko Jose Angel Urrutiaren esanetan: "Apotzagako jaitsierako partaide kopurua urtez urte handitzen joan da, eta aurten pilotu eta ikusle gehiago espero ditugu.
Ibilgailu barregarrienari saria
Modalitate bakoitzean podiuma lortzen dutenek saria izango dute. Emakume azkarrenak ere jasoko du saria, eta baita Eskoriatzako azkarrenak ere… baina sari berezia ibilgailu barregarriena duenak jasoko du; antolatzaileek ere prestatuko dute ibilgailu barregarri bat, urtero egiten duten moduan, baina euren goitibehera sari horretatik kanpo egongo da.
Bestalde, lasterketa hori babestu duten enpresek jarritako produktuekin zozketa egingo dute pilotu guztien artean.
Arriskuak saihestu nahian
Goitibeherek abiadura handia hartzen dute, eta, partaideek eta ikusleek izan ditzaketen arriskuak saihesteko, hainbat neurri hartu dituztela azaldu du Jose Angel Urrutiak: "Bi anbulantzia egongo dira, 150 lasto-fardo, eta ikusleak errepidera irten ez daitezen hesiak jarriko dituzte helmuga inguruan. Gainera, bihurgune bakoitzean bi komisario egongo dira, zerbait gertatzen bada laguntza emateko…".