Sanpedroak 2015 Eskoriatzan

San Pedro jaietako txupinazoa alkateak botako du aurten

Iaz, Kirol Elkartekoak arduratu ziren txupina botatzeaz. | Josetxo Arantzabal

Eskoriatzako San Pedro jaiak domekan hasiko dira ofizialki, ekainaren 28an, eta uztailaren 1era arte iraungo dute. Jaiei hasiera emango dieten txupinazoa eta pregoia 13:00etan izango da herriko plazan eta ardura hori Eskoriatzako Udaleko korporazio berriak hartuko du.

Beste urte batzuetan herriko elkarteak izan dira horren arduradunak. Iaz, esaterako, Eskoriatzako kirol elkarteak izan zuen txupina botatzeko aukera; izan ere, elkartearen 50. urteurrena zen. Aurten, aldiz, pregoia eta txupinazoa Joserra Zubizarreta alkate berriak egingo du.

Bezperaren bezpera

Jaien bezpera aurretik ere hainbat ekintza egongo dira motorrak berotzen hasteko. Eskoriatzarren zein egun hauetan kanpotik etorriko direnen aurreikuspenak betetzeko asmoarekin.

Bihar, zapatua, bezperaren bezpera izango da, eta kontzejupe nagusien pilota txapelketarekin hasiko da eguna. 11:30ean, aldiz, umeentzako parkea izango da plazan, eta Dorleta paper dendaren ondoan, goizez, 11:30etik 14:00etara bitartean, eta arratsaldez, 16:30etik 19:00etara bitartean. Umeentzako parkea ixtean, Vhs Street Band txaranga izango da herrian zehar, eta 22:00etatik aurrera kaleak girotzen jarraituko dute.

Gazteen Eguna 29an

Aurten, gazte koadrilen arteko II. jokoak egingo dituzte, 12-17 urte bitartekoentzat. Gernika plazan izango dira, 19:00etan. Ondoren, Gazte afaria egingo dute gaztelekuan, 22:00etan. Egunari amaiera emateko berriz, disko festa izango da 23:00etan, udal Liburutegi ondoko parkean.

Errepidea bihar itxiko dute

Udaletxe aurreko errepidea oinezkoentzat bakarrik izango da jai guztietan, uztailaren 2ko 07:00ak arte. Ikuskizun gehienak kalean izango dira, baina, eguraldi txarra eginez gero, horietako batzuk Joseba Iñurrategi pilotalekuan, Manuel Muñoz kiroldegian edo Zaldibar antzokian izango dira.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.