San Pedro auzoko obrak egiteko bost enpresa aurkeztu dira, eta horietatik Sasoi eraikuntza enpresak, puntu gehien lortuta, egingo ditu lanak. Aurrekontua 247.000 euro da, BEZik gabe, baina 212.000 eurotan esleitu diote.
Gainera, baldintza guztiak betetzen dituen Sasoi eraikuntza enpresak langabezian dauden bi langile kontratatuko ditu jardun osora, eta obrak hilabete barru hasiko dira, gutxi gorabehera. Lanek hiru hilabete eta erdi iraungo dute, eta denbora horretan hainbat eragozpen sortuko dira auzoan. Beñat Herce jarduneko alkateak hauxe azaldu du: "Ura moztuko dute, aparkaleku batzuk ezin izango dira erabili, ezta etxeetarako sarrera batzuk ere… baina Udaletik pazientzia eskatzen diegu herritarrei".
Zaldibarko obraren likidazioa
Zaldibar antzokia lau urtetan egindako azpiegiturarik garrantzitsuena izan da Eskoriatzan. Milioi bat eta seiehun mila euroko kostua izan du, eta, horrez gain, 10.000 euroko gain-kostua egon da.
Herceren esanetan, "kostu hori justifikatuta dago; izan ere, Udalak obran bertan hainbat aldaketa eskatu ditu. Aldagela ez zen obra barruan sartu, aretoko sarreran aldaketa batzuk izan dira, eta anfiteatroan ere bai. Hala, diru gehiago jarri behar izan da lanak egiteko".