Eguerdiko ordubatean elkartu dira Udal ordezkariak eta gainerako politikariak. Batetik herrikoak: Udal gobernuko kideak, Beñat Herce alkatea buru dela; oposiziokoak; eta herriko eragileak: auzo alkateak, erretiratuak, Atxorrotx kultur elkarteko ordezkariak… Eta bestetik, kanpotik etorritakoak, horien artean Aldundiko kultura diputatu Ikerne Badiola eta inguruko hainbat udaletako ordezkariak.
Herriko dantzariek agurra dantzatu eta halakoetan ohikoa den zinta mozketak ofizial egin du inauguratzea. Ondoren alkateak ongi-etorria egin dio kulturari eskainitako areto berriari eta eskerrak eman hura errealitate bihurtzeko lanean jardundakoei. Santa Ana auzoan dagoen eraikina, baina, ez da berria, XVI. mendekoa baizik. Eta horren historia jaso dute dokumental batean. Irudiekin, argazkiekin eta herritarren bizipenekin osatu dute ikus-entzunezko hori eta eguerdian eman lehenengoz.
Behin ekitaldi ofiziala eginda, herritarrendako bisita gidatuak antolatu dituzte arratsalderako: 18:00etan, 19:00etan eta 20:00etan. Alkateak harrera egin, dokumentala ikusi eta aretoa ezagutzeko bisitak izango dira.
Hemendik aurrera kultura izango da protagonista areto berrian eta Kultur Mahaiak egitarau dotorea osatu du datozen egunetarako.
Bai Beñat Herce alkateak, bai Ikerne Badiola kultura diputatuak kulturarako topalekuaren garrantzia azpimarratu dute.
