Orain arte egindako proiektu guztien balorazioa eta hurrengo hiru urteetarako eskoriatzarrek egindako ekarpenen informazioa dago ikusgai.
Erakusketa hiru zatitan dago banatuta: lehenengo zatian, azaroaren 8an, Manuel Muñoz kiroldegian egin zen Eskohitzaren 4. ekitaldian esan zirenak aipatzen dira, han egin ziren hiru ariketak azalerazita: proiektu guztien puntuazioa eta balorazioa, egiteko dauden proiektuen garrantziaren araberako sailkapena eta Eskohitza ekimenean egon zirenen proposamen eskaerak.
Bigarren zatian, berriz, azaroaren 16an, Eskohitza gaztean eginiko ekarpenak aipatzen dituen gunea dago.
Hirugarren zatian, Udalak dituen lau proiektu berriren ideien informazioa dago: kiroldegiko kanpoko igerilekua, Itxaurtxuetako haur parkea, auzo-konposta eta erdiguneko zirkulaziorako proposamena.
Batez ere, Eskoriatzako kanpoko igerilekua kentzearen inguruko proposamenak nahi ditu Udalak, eta hiru aukera proposatu ditu: ur joko eremu bat sortzea, padel kantxa bat egitea edo belardi zabala uztea, eguzkia hartzeko, adibidez.
Iritzia emateko aukera
Erakusketara joaten denak Udalak egin nahi dituen lau proiektuen inguruan iritzia emateko aukera izango du, han egongo den plantilla bete eta eskaera-orri hori udaletxe, kiroldegi, kultur etxe edo liburutegiko gutunontzietara eramanda.
Erakusketara gerturatu ezin duenak, berriz, nahi dituen ekarpenak egin ditzake partehartzea@eskoriatza.net helbidera idatzita. Hala, azaroaren 8an egin zen Eskohitzaren ekitaldira joan ez zirenek beste aukera bat izango dute nahi dituzten ekarpenak egiteko.