Zuzendaritza pozik dago aurreikusita zegoen epean hasi direlako lanean Eskoriatzan; gainera, esan dute asteon Garagartzan hasiko direla ekoizpenarekin.
Nazioarteko bezeroak
Zuzendaritzak azaldu du presio-eltzeak ekoizteko eskaera handia dutela, batez ere nazioarteko bezeroen aldetik. Alde horretatik, adierazi dute balioan jarri nahi dutela eskoriatzako lantegia; izan ere, Fagor Euskal Herriko eta Espainiako merkatuko liderra izan zen presio-eltzeei dagokienez, %40ko merkatuko kuotarekin. Gainera, mundu mailan erreferente izan da Fagor.
Urrian zehar ekoizpenerako beharrezkoak diren makinak puntuan jartzen ibili dira Eskoriatzako lantegian. Horrez gain, langileak formatzen eta trebatzen ibili direla azaldu du zuzendaritzak prentsa ohar bidez, bai zuzeneko eskulana eta baita zeharkakoa ere. Lehenengo egunetan ekoizpen maila baxuan egin dute lan, prozesu guztiak behar bezala daudela ziurtatzeko. Behin hori eginda, poliki-poliki, produkzioa handitzen joango direla esan dute zuzendaritzatik, lantegiaren ohiko produkzioa mailara iritsi arte.