Pilota aukeraketa eginda, prest daude bi pilotariak domekarako

Xala eta Retegi Bi, Eskoriatzako Joseba Iñurrategi pilotalekuan atzoko pilota aukeraketa egin zutenean. | imanol beloki

Domekan jokatuko den lau t'erdiko final-laurdenetako pilota aukeraketa egin dute Retegi Bik eta Xalak. Bi pilotariak 10:30ak inguruan hasi dira beroketa saioekin eta pilota aukeraketa 11:30ean izan da Joseba Iñurrategi udal pilotalekuan.

Xalak eta Retegi Bik pilota aukeraketa izan dute gaur goizean Joseba Iñurrategi udal pilotalekuan. 12 pilota probatu ondoren, bi aukeratu ditu bakoitzak; pilotaren botea, frontoiaren zabalera… kontutan izanik. Goiz lasaia izan den arren, hainbat pertsona joan dira gaurko hitzordura. Izan ere, Eskoriatzako pilotazaleak gogotsu daude domekako lehia ikusteko.

Bi pilotariak gustura

Xala: "Materiala ona izan da. Hiru pilota oso berdintsuak dira. Retegi II.ak hartu duen pilota bat ezberdina da narru motagatik…, baina arazo barik. "

Retegi Bi: "Txapelketa osoan erabili ditudan antzeko pilotak aukeratu ditut. Narru marroizko pilotak dira, kontrolatzeko errazak ez direnak, baina politak dirudite.

Hala, gaurko pilota aukeraketa eta entrenamenduarekin pozik geratu dira bi pilotariak.

Domekako lau t'erdiko final laurdenetako buruz-buruzkoa 17:00etan izango da eta partidu estelar honen aurretik, ikuskizuna berotzeko, Jaunarena-Rezusta eta Altuna III-Barriola izango dira eskuz-binaka.

Sarrerak salgai

Sarrerak 25 eurotan daude salgai eguaztena ezkero; Urrestilla tabernan, Inkernun eta Dorleta liburu-dendan eros daitezke aurrez. Txarteldegian erosi nahi dituenak, berriz, ordubete lehenago erosteko aukera izango du egunean bertan. Hitzordura gerturatu ezin duenak, bestalde,  ETB1en zuzenean ikusteko aukera izango du.

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.