Final-laurdenetako partidua ikusi nahi dutenek Urrestillan, Inkernun eta Dorleta liburu-dendan eros ditzakete sarrerak aurrez. Bestela, domekan, 16:00etatik aurrera leihatilan ere egongo dira salgai. Sarrerek 25 euro balio dute.
Dena erabakitzeko
Oraindik ez du inork ziurtatuta finalerdietarako txartela, dena dago erabakitzeko. Retegik 11 tantoko aldeagatik irabazi beharko dio Xalari, eta, horretaz gain, Irujoren porrotari itxaron beharko dio sailkatu nahi badu. Bestetik, Xalak sailkatzeko partidua irabazi beharko du eta gainontzeko emaitzei itxaron. Beraz, ez da ezer erabakita egongo Irujoren eta Saralegiren arteko partidua jokatu arte.
Sailkapenerako partidua baino lehen, lagunarteko norgehiagoka bat jokatuko da giroa berotzen joateko. Partidu horretan, Jaunarenak eta Rezustak Altuna III.aren eta Barriolaren aurka egingo dute.
Bestalde, eguenean pilota aukeraketa egingo da. Beroketa 10:00etan hasiko da, eta 11:30etan pilota aukeraketa egingo da.
