"Helburua da hausnarketa bultzatzea", dio Maitane Igartuak, Elkarhezitzen elkarteko kideak: "Nekazaritzaren egoeraren berri eman gura dugu. Eta elikadura burujabetzaren gainean hausnartu, elikatzeko orduan arduraz jokatzeak ekar ditzakeen aldaketen gainean, esaterako". Tertulia gidatuko duen inor ez da etorriko, baina ikusleen artean solasaldia sortzea interesgarria litzatekeela uste dute antolatzaileek.
Sistema jasangarria
Mugarik Gabe elkartearen esanetan herriek eskubidea dute elikagai nutritiboak, kultura aldetik egokiak, eskuragarriak eta modu jasangarrian eta ekologikoan ekoiztutakoak kontsumitzeko. Gainera, diote lehentasuna eman behar zaiela tokiko ekonomiari eta merkatuei, eta elikagaien ekoizpena eta kontsumoa oinarritu behar dela ingurumenaren, gizartearen eta ekonomiaren aldetik jasangarria den sistema batean. Horrez gain, diote emakumeek egiten duten lana eta hari lotutako eskubideak aitortu behar zaizkiela.
Hain zuzen gai horiek landuko dituzte dokumentalek: laborantza eta abeltzaintza ereduak; baserritarren mugimenduak; emakume baserritarren egoera eta horiek sortutako elkarteak… Bizilurrek egindako dokumentala ere emango dute Bide berriak: Elikadura burujabetza Euskal Herrian. Kontsumitzen diren elikagaien gaineko galderak botako dituzte, eta agertzen direnen artean dago Eskuernagan bizi den Esti Besa aretxabaletarra.
Egitaraua
Hona Ibarraundi museoan emango dituzten dokumentalak (19:00).
Urriak 15, eguaztena
- El futuro de nuestra alimentación está en juego (Espainia, 2011, 4 min.)
- Bide berriak: Elikadura burujabetza Euskal Herrian (Euskal Herria)
Urriak 29, eguaztena
- Mujeres campesinas andaluzas (Andaluzia, 2011, 13 min.)
- Tres historias y un vaso de leche (Katalunia, 2007, 26 min.)
- Campesinas, semillas de cambio (Nikaragua, 2007, 25 min.)