"Jendea gauza berri bila dabil, eta Arrasateko, Aretxabaletako edota Oñatiko mendi bizikleta martxek joera berria izan dute azken bolada honetan, bidezidor gehiago, jaitsiera teknikoagoak... Hala, Eskoriatzako martxak 25 urte beteko ditu, eta erabaki dugu guk ere pista zabalak alboratzea eta beste proposamen bat egitea", adierazi du Iban Diaz antolatzaileak.
Emaitza ikusgarria izango da, seguru, baina horrek lan galanta dakar aurretik: "Irailean hasi ginen bidezidorrak bilatzen, berriak egiten, bata bestearekin lotzen... Emaitzarekin gustura geratu gara, baina ikusteko dago jendeak zapatuan zer esaten digun".
Ibilbide motza (21 kilometro) zorrotza dela aitortu digute eta luzea (37 kilometro), berriz, sasoian daudendako. "Jaitsiera politak daude, teknikoak, baina egingarriak. Eta bai, inguruko jaitsiera eder guztiak egiteko, lehenengo igo egin behar da".
Bihar, zapatua, 09:00etan hasiko dute martxa, eta 08:15etik egongo dira izenak hartzen (15 euro), plazan.
