Ordu eta erdi pasako kontzertu borobila egin zuten, haur txikiak eta publiko nagusia elkarrekin nahastutako zaleen artean; horietako gutxi batzuk lehenengo ilaratan zeuden aulkietan jarrita, zutik eta dantzarako prest baina zale gehienak. Lehenengo kantutik erakutsi zuten musikariek ere, gustura zeudela eta dena ematera etorri zirela, etengabe eskerrak emanez kantuen artean.
Lasai hasi eta dantzan bukatu
Alma de cantaora eta urrian kaleratuko duten Espiritu del Sol lanetako kantu lasaiak bilduaz osatu zuten emanaldiaren lehenengo zatia. Formatu akustikoan eta hitz sakonak, serioak, kantatuz bete zuten, bada, kontzertuaren lehenego erdia. Lasaitasunak algarari eta jaiari egin zion baina, gero lekua; Alma de cantaora laneko kantu biziagoak eta Amparanoia garaiko kantuekin jarraituz errepertorioa. Amparo abeslariak eszenatoki azpian zeuden aulkiak erretiratzeko eskaera egin eta berehala egin zion kasu publikoak, txukun txukun eretiratuz bakoitzak berea. Aretoa dantzalekua bilakatu zen bete-betean.
Penaz bukatu zuten alde bietakoek emanaldia; denak pozik., publikoa, musikariak eta baita antolatzaileak ere. Hasiera borobila eman zioten guztien artean, aurtengo Errekan Gora jaialdiari.
Azkoaga-Enea hotelean lo eginda, goizeko 11:00ak bueltan abiatu dira Amparanoia eta haren taldekiadeak Tarrasara, han beste kontzertu bat egingo dute-eta gaur.
Iruñeako J&P Brass taldeak hartuko du gaur lekukoa
Gaur, zapatua, herriko plazan egingo dute 22:30etan hasita kontzertua nafarrek, askotariko estilotako kantuak aukeratuta, emanaldi dibertigarria izango dena. Ikusgarria izango da, era berean, herriko kaleetan zehar iluntzean egingo duten emanaldi ibiltaria.