Urrutiak adierazi duenez, kargua uztea ez da erabaki erraza izan, baina bizi duen egoera pertsonalak eragotzi egiten dio hartutako ardurak behar bezala betetzea. Hori dela eta, nahiago izan du lekukoa Regidorri ematea, bere konpromisoagatik eskerrak emanez, eta alderdiaren babes osoa eskainiz. Gaineratu du beti egongo dela alderdiari laguntzeko prest eta eskoriatzarrei eskerrak eman nahi izan dizkie beragan konfiantza izateagatik.
Regidorrek, bere aldetik, erronka berri honi ilusio eta gogoz ekingo diola adierazi du, eta gaineratu du, herritarrekin harreman estua izan eta elkarlanean aritzea nahiko lukeela. Regidorrek datorren hilean egingo dio zin kargu berriari eta adierazi duenez, astean behin, kexa edo iradokizunik duen edozein herritarrekin biltzeko prest egongo da, sor daitezkeen arazoei elkarlanean konponbidea bilatzeko.