Txorizoa, gazta, euskal pastela, ogia, poltsak, otarrak, taloak... erosteko aukera izan da gaur goizean Arizmendi Ikastolak antolatutako ferixan. Denetarik zegoen, izan ere, ehun postu inguru jarri dituzte denetara. Arizmendiko umeek ere jarri dituzte eurenak krispetak eta pastak saltzeko. Arrakasta izan dute, izan ere, 13:00etarako dena salduta zuten.
Arizmendik antolatutako ferixia izanda, ezin falta umeendako jolasak. Hala, umeen gunea ere bazen puzgarriez, zezen mekanikoaz, eta aurpegia eta eskulanak egiteko guneaz, Santa Mariñe plazan. Bestalde, txorimaloen lehiaketa ere egin dute.
Eskoriatzako dantza taldeak emanaldia egin du herriko plazan, 13:00etan. Jende ugari batu da. Plazan bertan, Kroxeters taldeak Urban knitting izeneko ekimena egin du. Hala, plazako zuhaitzetan jarri dituzte goizean zehar egin dituzten gantxillo eta crocheta lanak.
Urkabustaizko Joaldunak herriko kaleetan zehar ibili dira azoka alaitzen, baita trikitilariak ere. Giro bikaina egon da Eskoriatzan, eta eguraldi ona lagun, jendetza batu da.