Lehiaketa bat den arren, Mirian Isasmendi antolatzaileak aipatu moduan, "ekimenaren helburua umore onean ondo pasatzea da", baina, horrez gain, gazteen sormena ere landu nahi da. Gaur izango da www.eingeike.org webgunean izena emateko azken eguna.
Bihar, 09:30ean, lehiakideei ongietorria egingo zaie kultura etxean, eta lanaren gaia emango zaie. 19:00etan lanak entregatuko dituzte, eta parte-hartzaileek luntxaz gozatzen duten bitartean, epaimahaiak erabakia hartuko du. 21:30ean lanak proiektatuko dira, eta ondoren, sari banaketa egingo da.
'Kameratoia' Durangon
Topaguneak Kameratoia, Euskal Herriko ikus-entzunezkoen rallya, antolatu du gazte euskaldunen sormena bultzatzeko helburuarekin. Aurtengo edizioan, Durangoko Azokako Irudienea gunea izango dute agertoki nagusi, eta lehiakideek 48 ordu izango dituzte, hiru eta zortzi minutu bitarteko film laburra egiteko.