Asteburu honi begira hainbat ekintza antolatu dituzte Gaztelekuko kideek; izan ere, egubakoitzean, Gaba baltza eguna ospatuko dute. Zapatuan eta domekan, beldurrezko film laburrak grabatuko dituzte. Domu Santuarekin, beldurrarekin eta iluntasunarekin lotutako ekintzak, beraz, Gaztelekuaren eskutik.
Areto futbola gustuko dutenek, berriz, zapatuan izango dute zer egina. Izan ere, 18:00etan, areto futboleko Euskal Ligako partidua izango da Eskoriatzan: etxekoek Debabarrenaren aurka, eibartarren aurka jokatuko dute. Eta domekan, azkenik, gerria mugitzeko aukera izango dute herritarrek, Herrixa dantzan saioa izango da-eta, 18:30ean, Unibertsitateko kaperan. Hain justu, Patxi Montero ibiliko da gidari lanetan aurten ere. Iaz, oso arrakastatsua izan zen saioa.