Bost modalitatetan korrituko dute parte-hartzaileek: neumatika, arina, errodamendua banaka eta taldekoa, eta kuatropalos bezala ezagutzen dena. Denera, hiru txanda izango dituzte gidariek markarik onena egiteko: lehenengoan ibilaldia aztertuko dute, eta gainerako biak izango dira kronometratuko direnak. Antolatzaileen ustetan lasterketak bi ordu inguru iraungo du. Proba amaitzean, sari banaketa egingo da. Modalitate guztietako lehenengo hirurek garaikurra jasoko dute, eta lehenak, gainera, txapela.
Goitibehera dibertigarriena
Hainbat sari berezi ere banatuko dira zapatuan; horietako bat denbora onena egiten duen eskoriatzarrak irabaziko du, eta goitibehera dibertigarriena ere saritua izango da. Jose Angel Urrutia eskoriatzarra antolatzaile lanetan dabil. Horrelako lasterketa Eskoriatzan egiteko ideia nondik irten den azaldu digu. Jakinarazi digu gaur egun lau eskoriatzar daudela Euskal Herriko Inertzia Kiroletan federatuta: hain justu, Iker eta Lander Mediavilla, Mikel Oiartzabal eta Gorka Urrutia. Guztiek hartuko dute parte Apotzagako jaitsieran.
Lasterketa antolatzeko proposamena federazioak egin zuela gaineratu du, Apotzagako bidea aproposa zela esanez. Horren harira, honakoa esan du Urrutiak: "Hasiera batean, Sanpedrotan egiteko asmoa geneukan, baina ezinezkoa izan zen".
Udalarekin harremanetan jarri ziren geroago, eta Mugikortasun Astean egitea adostu zuten. Urrutia penatuta agertu da, Aramaioko rallysprinta egun eta ordu berean delako eta zale asko lasterketa batera edo bestera joatea erabaki beharko dutelako; nabarmendu gura izan du geroago jakin zutela bi probak egun berean zirela.