Besteak beste, lorezaintza zerbitzuaren kontratua luzatzea onartu zuten. Landu enpresari eman diote ostera ere. Horrekin batera, 2.600 euroren truke, auzokonposta guneetan sikua banatzeko zerbitzua ere enpresa horri esleitzea adostu zuten.
Horrez gain, oinezko eta ibilgailuen ordenantzaren 15. Artikulua aldatzea onartu zuten. Beñat Herce alkateak azaldu zuen elbarriendako aparkalekuen erabileran kezkak azaldu direla eskoriatzarren artean, eta hori dela-eta, ordenantzan aparkaleku horien erabilpenean honako debekua txertatzearen alde agertu ziren zinegotzi gehienak: elbarrien laguntzaileak aparkaleku horiek bi ordutik gora ez erabiltzeko debekua.
Erregistroa goizez
Bestalde, urriaren 1etik, udaletxeko sarrera eta irteera erregistroen ordutegia aldatzearen alde bozkatu zuten. Astelehenetik egubakoitzera bitartean, 09:00etatik 14:30era egongo da hori herritarren eskura; eta eguen arratsaldetan ez da zerbitzurik emango. Horren bueltan, alkateak azaldu zuen oso gutxi erabiltzen dela erregistroa arratsalde horretan, eta goizeko ordutegia zabalduz herritarrei zerbitzu hobeagoa emango zaiela.
Bestetik, bi mozio ere eztabaidatu zituzten. Kidetza elkarteak, zaintza partekatuaren alde aurkeztutakoa ez zuten onartu. Bai, ordea, Ezker Anitzak aurkeztuta, Espainiako gobernuaren dimisioa eta hauteskundeak eskatzen zituen mozioa.
Hirugarren osasun parkea
Alkateak, gainera, jakinarazi zuen Aingeru Guardan osasun parkea jartzeko asmoa dutela. Aurreko agintaldian erreituratuei zuzendutako bi osasun parke jarri zituzten bidegorri ondoan, bat Dorletan eta bestea Olazarren. Atzoko osoko bilkuran 13.500 euroko partida sortuko zela iragarri zuen, etorkizunera begira, hirugarren parke bat jartzeko.