Hasiera batean hiru proiektu ezberdin moduan irudikatu bazituzten ere, proiektu bakarra izateak eta enpresa bakarrak exekutatzeak abantailak dituela kontuan hartuta, hiru proiektuak modu integralen jasotzen dituen proiektua garatzea eskatu zitzaion LKS enpresari. Arana-Gaztañadui kaleen saneamendua eta asfaltatzea, ur hoditeria berritzea eta autobus geltokia lekuz mugitzea eta bidegurutzean biribilgune bat egitea jasotzen du proiektuak.
Horren guztiaren berri martitzeneko bileran emango dute, 19:00etan Kultura etxean. Herritar guztiei zuzendutako komunikazio bilera izango da.
Mugikortasunean aldaketak eragingo ditu
"Herriko mugikortasunean aldaketa nabarmena suposatzen du proiektu honek eta horregatik komenigarri ikusi dugu herritarrei informazio zabala eskaintzea", azaldu du Beñat Herce alkateak. Gainera, herritarrek dituzten kezkei erantzuna emateko modua ere izango da batzar informatiboa.
Arana-Gaztañadui kaleen saneamendua eta asfaltatzea, ur hoditeria berritzea, autobus geltokia lekuz mugitzea eta bidegurutzean biribilgune bat egiteko proiektuaren lanak dagoeneko lehiaketara atera ditu Udalak. Asmoa da lanok iraila eta azaroan zehar egitea.
Lan handiena, eta garrantzitsuena, biribilgunea egitea izango da. Santa Ana, Olazar eta errepide nagusiaren bidegurutzean egingo dute biribilgunea. Garrantzitsua izango da, era berean, Intxaurtxueta eta Arana arteko errepidea asfaltatzea.