Atzo eman zioten hasiera Eskoriatzako udalekuei: goizean, umeen adinaren araberako taldeak osatu zituzten; hain justu, Lehen Hezkuntzakoekin sei talde, eta Haur Hezkuntzakoekin, hiru. Aurkezpenak eta hainbat jolas egin ostean, pozik eta apur bat urduri joan ziren haurrak bazkaltzera, arratsaldean desfilea zuten-eta.
Ingurumena eta osasuna gaiei lotuta, desfilea egin zuten plazan; talde bakoitzak naturarekin zerikusia zuen elementu bat hartu zuen: txikienak txirrindulariz irten ziren, kaskua buruan zutela. Beste batzuk, ordea, Aitzorrotz, Kurtzebarri edo Jarindo bezalako mendiez mozorrotu ziren, buruan kartoizko konoa zutela.
Astelehenean, San Fermin
Atzokoa hasiera baino ez zen izan, hilabete osoan zehar askotariko ekintzak egingo dituzte-eta. Urtero moduan, San Fermin eguna egingo dute; aurten, astelehenean, izango da umeek hain gustuko duten jaia.
Bestelako ekintzak ere egingo dituzte hilaren 23ra bitartean. Besteak beste, uraren egunak, mendi irteerak, sukaldaritza, igerilekura irteerak, Gamarra eta Gopegira txangoa, bizikleta eta patinetan irteerak eta azken eguneko jaia izango dituzte.