Festak alaitzeko, musika eta algara baino hoberik ez dago. Akaso horregatik, San Pedro egunean musikak garrantzi berezia izan zuen. Egun osoan zehar Eskoriatza festa handi bat zen eta bazkal osteko uneetan herria apur bat lasaitu zen arren, Burrunba Kelele batukadak berriz piztu zuen festarako grina.
Kalejira zaharren egoitzatik hasi eta herriko hainbat txoko eta kaletatik pasa ostean, plazan saio berezia egin zuten. Perkusio doinuek, gainera, ikusle bat baino gehiago dantzan jarri zuten.
Gauean musika gehiago
Gorosarri plaza lepo bete zen Xabier Lete omentzeko. Sortuko dira besteak ikuskizunak jendearen txalo ugari jaso zituen eta entzuleak oso gustura bukatu zuten kontzertua.
Aldi berean, gazteek ere kontzertua izan zuten txosnagunean. Iñigo Cabezafuego bakarlariaren doinuek luze jo zuen eta gauaren lehen uneak ederki alaitu zituen.