Eskoriatza kalean da

Eguraldiaz gain, festa giroak eskoriatzarrak kalera atera ditu. Atzoko danborrada jendetsuaren ostean askok parranda goizeko ordu txikietan bukatu arren, gaur goizean goizetik herri osoa kalera irten da. Bandaren kontzertuak eta txistularien kalejirak herriko plaza bete dute.

Zapatua ez da etxean geratzeko eguna eta eskoriatzarrek ez dute dudarik izan. Eguraldia lagun zutelarik, logura eta nagiak etxean utzi eta festa kalean ospatzera irten dira. Lehen orduetan gautxori bat edo beste zegoen arren, egunak aurrera egin duen bitartean familiek eta adineko jendeak bete dute herriko plaza.

Sanpedrotan ez da aitzaki gehiegirik falta izaten, baina hala ere, txistularien doinuek hasi dute eguneko giroa berotzen. Jendeak zerbait edan eta jaten zuten bitartean, herriko bandaren txanda iritsi da. Plazako eszenatoki gainetik programa oso anitza eskaini dute eta ikusleek gogotik txalotu dituzte abesti guztiak. Bazkal ordua hurbiltzen zen heinean, jendea etxera joaten hasi da, baina ziur arratsaldean kaleak berriro beteko direla.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.