Aurtengo berritasuna da Debagoieneko musikariei ere egin gura izan dietela lekua; hala, gaurko aurkezpenean iragarri dute Arrasateko The Potes taldea, The Pogues talde irlandarraren bertsioak, Oñatiko Ganbara abesbatza eta Eñaut Zubizarreta aretxabaletarra ere izango direla gonbidatuen artean.
Kanpokoendako zein bertakoendako oso egitarau aberatsa eta gozatzeko aukera eskaintzen duena dakar aurtengo Errekan Gora egitasmoak, Eskoriatzako Jose Angel Petralanda Kultura zinegotziak eguerdian jakinarazitakoaren arabera. Eta aurkeztutako egitarauak hala izango dela baieztatu du.
Blues musikatik, trikiraino
Blues, country, triki, klasiko zein rock doinuen hartuko dituzte Eskoriatzako bazterrak uztaileko asteburuetan, Travelling Brothers bizkaitarren bluesekin hasi eta Bizardunak taldearen rock parranderoarekin bukatuz. Tartean, izen handiak ere badira, besteak beste jaialdiaren kartel-buru izango den Kepa Junkera. Junkerak uztailaren 19an eskainiko du kontzertua Santa Marina plazan.
Atxorrotx Mendiko Nazio jaia
Errekan Gora egitasmoaren seigarren edizioa borobiltzeko, gainera, Atxorrotz Mendiko Nazio jaia antolatu dute, orain hiru urte moduan. Horretarako, Bizardunak igoko da berriz ere mendira kontzertua eskaintzeko, hala ere, egun osoan zehar hainbat ekintza antolatuko dituzte.
Errotuta dagoen egitasmoa
Eskoriatzako udako eskaintza kulturalaren antolatzaileek azpimarratu dute urteotako erantzuna ikusita, eskoriatzarren zein bisitarien artean errotuta dagoen egitasmoa dela Errekan Gora eta eskerrak eman gura dizkiete urtero berorren antolaketan laguntzen duten enpresa zein erakundeei, bereziki, Eskoriatzako Udalari zein Azkoaga Enea hotelari.