Kultura batzordekideek, lorezaintzako profesionalek, Olazar erretiratuen elkarteko kideek eta aurreko urteotan esandako lehiaketa irabazitakoek osatutako epaimahaiak lehen aukeraketa egingo du, eta zortzi balkoi eta leiho aukeratuko ditu.
Balorazioa egiteko irizpide estetikoak neurtuko dira, eta bereziki, bi hauek: batetik, lore-konposizioaren bolumen eta kolore konbinazioa; eta, bestetik, leiho edo balkoiaren kokapenaren arabera egindako egokitzapena.
Herritarren botoa
Hilaren 18tik 21era bitartean, epaimahaiak aukeratutakoen argazkiak kultura etxean eta Interneten egongo dira ikusgai, gura duenak botoa eman dezan; pertsona bakoitzeko boto bakarra onartuko da. Aurtengo irabazlea aukeratzeko hiru boto izango dira kontuan: bata kultura batzordeak emango du; bestea, Olazar elkarteak; eta, azkena, herri bozketatik irtengo da. Horren gaineko erabakia San Pedro bezperan, ekainak 28, jakinaraziko da. Sari bakarra egongo da: bertako produktuez osatutako saski ederra.