Gaur, astelehena, liburutegiaren eguna dute, eskulanak, ipuin kontaketak eta liburu zozketen bidez. Bihar, martitzena, lehen ziklokoak Ekainberriko kobazulora doazen bitartean, Haur Hezkuntzakoek tailerrak eta Lehen Hezkuntzakoek antzerki entseguak, abestiak eta filmak izango dituzte.
Etzi, goizean, Arrasateko herri eskolakoendako jaialdia egingo dute Lehen Hezkuntzakoek; eta arratsaldean, gurasoendako emanaldia izango dute ziklo berekoek. Eguenean, hiru hitzordu dituzte: lau eta bost urtekoek Barriako barnetegira irteera egingo dute gaua pasatzera; Lehen Hezkuntzakoek Aretxabaleta herri eskolakoendako jaialdia dute goizean, eta arratsaldean, gurasoendako emanaldia. Egubakoitzean, Lehen Hezkuntzako 2. eta 3. ziklokoek txangoa dute Donostiara.
Abesti eta logo berriak
Azkenik, zapatuan, eskolaren jaialdia egingo dute plazan; eta horren bueltan, askotariko ekintzak antolatu dituzte egun osoan. Horrez gain, labetik atera berri duten eskolako abestia zein logotipo berriaren aurkezpena egingo dute.