18:00etan lehenengo sirenak jo duenean hasi da Eskoriatzako Ibarraundi museoan antzerkiaren festa. Formatua, sinplea: zazpi antzezlan labur denak batera, bakoitza bere txokoan. Eta behin antzezlan bat ikusitakoan, hurrengora salto egiteko aukera. Hori, nahi izanez gero, museoaren aurrean jarri dituzten pintxoetatik pasatu ostean. Horrelako ikuskizunetara ohituta ez gauden arren, ekimenak erantzun ona izan du, eta ez dira gutxi izan Ibarraundi museora joan direnak.
Ikuskizunetan, banaka, binaka edo taldeka, eskoriatzarrak izan dira aktore lanak egin dituztenak. Fin gainera, ikusleen txalo zaparradei kasu eginez gero. "Oso orijinala izan da" zioen atsedenaldietako baten ikusle batek; beste batek aldiz, berritzailetzat jo du: "Proposamen berria izan da; antzezlanekin izpiritua eta mokadutxoekin gorputza betetzeko aukera ematen du". Orijinala, berritzailea... eta arrakastatsua.