11:00etan agertu dira Diputazioko ordezkariak udaletxean, Martin Garitano diputatu nagusia buru zela. Zain zituzten ordurako zinegotziak eta langileak. Osoko bilkuren aretora igo eta proiekzio baten bidez, Eskoriatzako errealitatearen berri eman dizkie Beñat Herce alkateak, baita etorkizuneko erronken berri ere.
Udaletxea utzi aurretik, langileek eta udal ordezkariek euren kezkak helarazi dizkiote; besteak beste, euskara edo enpleguarekin lotutako iradokizunak egin dizkiote.
Unibertsitatean ikasleekin
Jarraian, unibertsitaterantz abiatu dira Diputazioko eta Udaleko ordezkariak. Mondragon Unibertsitateko errektore Josu Zabalak hartu ostean, ikaslez betetako gela batera joan dira. Horien kezkak erantzuten saiatu dira.
Bisitak ez dira hor amaitu. Handik Mazmelara joatekoak ziren, auzo alkate eta auzotarrekin batzartzeko, eta bazkaldu ostean, herriko instalazio esanguratsuenak bisitatzeko asmoa dute. Hain justu, Zaldibar antzokia, zaharren egoitza, kiroldegia eta Zubiate labea.
Eguna amaitu arretik, eskoriatzarren ekarpenak jasoko dituzte 18:30ean, Ibarraundin hasiko den batzar irekian.