Mendizabalek erabilitako teknikak eta jorratutako askotariko gaiek jende ugariren interesa piztu dute. Hala, Eskoriatzan egindako erakusketa solidarioaren ondorioz, margolanetako batzuk Debagoiena utzita kanpora ere joango direla eman dute aditzera. "Alemaniara edo Frantziara, besteak beste".
Bildutako diru guztia Albaniara bideratuko du Arizmendi Ikastolako Almen guneko irakasle ohiak. Hango Marianisten Ordenak esku artean dituen proiektuak finantzatzeko izango da; zehatzago esanda, Mendiolako Jesus Madinabeitia misiolari marianista Albaniako Lezhë hirian bultzatzen ari den proiektuetarako.
"Helburu hori edukitzeak erosleengan eragingo zuen, ziurrenik". Arrazoiak arrazoi, aurrez pentsatutakoa baino lan gehiago saldu zituen Mendizabalek; 40 inguru.