Hasieratik nagusi izan ziren Eskoriatzakoak, eta partidua aurrera joan ahala, konfiantza lortu zuten. Lehenengo laurdenean zalantza asko izan zituzten, baina bigarrenean finago ibili ostean, atsedenaldira 31-23ko emaitzarekin joan ziren.
Partidua erabaki
Hirugarren laurdenean partidua erabaki zuten. Rasoren esanetan, taldearen laurden onena izan zen eta atzean gogor ibili eta eraso eta defentsa arteko balantze azkarrak egitea lortu ondoren, 15 puntuko aldearekin heldu ziren azken 10 minutuetara. Azken laurdena ere gogotsu hasi zuten etxekoak, 20 puntuko aldea lortuz. Baina partiduaren amaiera heldu ahala, defentsan intentsitatea galdu zuten, eta horrek aurrean zalantzekin jokatzera eraman zien. Hala ere, aldea mantendu eta partidua irabaztea lortu zuten.