Mondragon Unibertsitateko talde baten proiektuan oinarritu da Udala ekimena aurrera ateratzeko. Honakoa azaldu du alkateak: "Enpresagintza fakultatetik heldu zitzaigun eskaintza: ikasleek merkatu ikerketa garatu behar zuten, eta horretarako, sektore eta mota ezberdinetako enpresa eta erakundeetara jo zuten. Udaletik egoki baloratu genuen eskaintza eta egoki ikusi genuen udal zerbitzuen gaineko informazioa jasotzea, zerbitzuen hobekuntza iraunkorra bultzatze aldera".
Askotariko zerbitzuak
Inkesta Udalaren webgunean dago herritarren eskura. Askotariko gaien gainean galdetzen da horretan, hala nola, Udalarekin kontaktuak jartzeko bideez, herritarraren ikasketa mailaz eta lan eremuaz zein udal zerbitzuen erabilpenaz eta horien balorazioaz. Azken horretan, honako zerbitzuak baloratzeko eskatzen da: Harrera, Udaltzaingoa, Gizarte zerbitzuak, Hirigintza, Obra eta zerbitzuak (Brigada), Idazkaritza-kontuhartzailetza, Zerga-bilketa, Kultura, Euskara eta Gazteria.
Epea bukatuta, emaitzak aztertu eta baloratuko dira. Horra hor alkateak esandakoa: "Horretarako, emaitzak langileekin ere komentatuko ditugu eta beraien iritzia jaso. Jarraian, emaitzak ikusita hobetzeko neurriak proposatuko ditugu, eta bideragarriak diren aztertu". Askotariko neurriak izan daitezke: esaterako, herritarrenganako harrera ordutegia aldatzea, telefono bidezko arreta zabaltzea edo Internet bidezko tramiteak sustatzea. Horren harira, Hercek inkesta betetzeko gonbitea egin gura izan du.