Eskoriatzan kirola egiten bada ere, kiroldegiko instalazioak ez direla behar beste erabiltzen uste du Kirol zinegotzi Igor Ezpeletak.Horregatik kiroldegiko ateak zabaldu zituzten joan den asteko eguenean eta barikuan. Asmoa: Hango instalazioak eta eskaintza ezagutu, hainbat jarduera debalde probatu eta gustuko izanez gero, izena eman.
Askotariko jarduerak eskaintzen dituzte, hala nola, aikido, pilates, tonifikazioa edo spinning. Horretaz gainera, Ezpeletak jakinarazi du bestelako jarduerak eskaintzeko gertu ere badaudela, baina ikaslerik ez dutela.
Ate irekiak antolatzearekin batera, egoerari buelta emateko, kirol teknikariaren beharra ikusi dute Udalean, eta horretan dihardute azken hilabeteotan.
KPIren igoera
Herrian dauden kirol instalazioak erabiltzeko gonbidea egin du Ezpeletak. Horren harira, gogorarazi du urte berriarekin batera, tarifa gehienek KPIren igoera izan dutela, hainbat jaitsi badira ere.
Askotariko tarifak daude, erabiltzaile bakoitzaren beharretara egokituta. Banakako abonuari dagokionez, 18 urtetik gorakoenak 103,55 euro balio du urte osorako. Ikasleek, Eskoriatza kirol elkarteko federatuek eta langabetuek, 53,65 euro ordaintzen dituzte. Familia abonua, ostera, 141,45 euroren truke eskura daiteke; eta familia ugariena 70,45 euroren truke. Urte erdi eta hiru hilabeteko abonua egiteko aukera ere badago.
Horretaz gainera, kiroldegiko kantxa ere alokatu daiteke, 43,85 eurogatik argiarekin, eta 37,25 argi barik; baita pilotaleku txikiak ere 4,75 euroren truke.