Poliziak emandako informazioaren arabera, 10:30ean itxita dagoen Eskoriatzako hotel baten parean ikusi zuten automobil bat zegoela aparkatuta, eta bi lagun zebiltzala bertan materiala kargatzen. Poliziak bertara joan eta ikusi zuten momentu horretan telebista bat zebiltzala autora sartzen. Horren gainean galdetu zietenean, poliziei esan zieten hotelaren kanpoko aldetik hartu zutela.
Indarrez zabalduta
Baina poliziek egiaztatu zuten hotelerako sarrera indarrez zabalduta zegoela eta susmagarriak barrura sartu zirela, autoan zuten materiala harrapatzeko. Handik gutxira, beste bikote bat lokalizatu zuten inguruan, eta lau lagunak atxilotu zituzten, ustez indarrez lapurreta egitearren. Polizia etxera eraman zituzten, beharrezko diligentziak egiteko.