Marixol Iparragirre Eskoriatzako euskal presoak berriro ere epaiketa izango du Parisen hilaren 12tik aurrera, hau da, astelehenetik aurrera. 2010eko azaroan egin zioten epaiketaren sententziari errekurtsoa jarri eta berau onartu ondoren dator beste epaiketa hau.
Lyongo espetxetik Fresnesera eraman dute dagoeneko Iparragirre eskoriatzarra, Parisko espetxe horretatik egingo baititu epaitegira joan etorriak. Esan moduan, epaiketa astelehenean hasiko da eta bere lagunek diote beharbada oso motza izango dela lekukoen testigantzarik ez dutelako onartu oraingoan.
Herritarrei deia
Herritar talde batek, gainontzeko herritarrei deia egin nahi izan diete Iparragirreri elkartasuna eta babesa adierazteko. Izan ere, diote ondo legokeela Eskoriatzatik Parisera talde bat joatea "Iparragirreri gure elkartasuna erakusteaz gain, herriak ere bere egoerari buruz ardura baduela erakusteko. Hilaren 12a astelehena da, baina batzuk edukiko dugu jai egunen bat hartzeko edo ikasleek jai hartzeko aukera ere edukiko dute" diote.
Bertara joatea nahi duten herritarrek, beraz, helbide honetara mezu bat bidali beharko dute: irrintzia@gmail.com.
Eskutitzak bidaltzeko
Bestalde, beste dei bat ere egin nahi izan diete Eskoriatzako herritarrei Marixol Iparragirreri elkartasuna adierazteko beste modu bat ere badagoela gogora ekarriaz; zuzenean berari eskutitza bidalitzeko aukera dagoela esan dute. Hauxe da helbidea: Marixol Iparragirre Guenetxea 965555, Fresnes - Maison d´arrêt 3, Allée des Thuyas, 94.261 Fesness Cédex, Frantzia.