Urtarrilean 8 urte egingo dituen Eskoriatzako Aratz Aldai mutikoak garun paralisia dauka hiru hilabete zituenetik. Jaso duten tapoi tona bakoitzaren truke 210 euro eman dizkiote familiari, eta, 25 tona jaso dituztenez, guztira 5.250 euro lortu dituzte eskoriatzarren eta inguruko biztanleen laguntzarekin. "Hasieran kosta egin zitzaigun tapoiak batzeko kanpainari martxa hartzea, baina orain erritmo ona hartu du. Denei eskerrak eman nahi dizkiet, alde guztietatik ekarri dituztelako tapoiak eta oso erantzun ona izan duelako", azaldu digu Aratzen ama Igone Armendarizek.
Lan handia egin ondoren, 25 tona jaso dituzte eta "oso pozik" daudela esan digu Aratzen amak. Etxeko komuna Aratzendako egokitu dute, traba guztiak kenduta, eta orain erosoagoa egiten zaie eguneroko bizitza.
Aurrerantzean Naiararendako
Aratzendako beharrezkoak ziren tapoiak batu ondoren, orain Arrasateko Naiara Agredaren aldeko tapoi bilketa kanpainari eman zaio hasiera.
Naiarak 8 urte ditu eta hark ere garun paralisia dauka. Tapoiak saltzetik ateratako diruarekin gaixotasunaren ondorioz sortutako gastuetako batzuei aurre egin nahi diete.
Tapoiak lehengo tokietan jasoko dira.