Ohiko osoko bilkura egin zuten atzo, eguena, eta bertan hainbat gai izan zituzten berbagai, tartean, 2011ko kontu orokorrak onartu zituzten aho batez.
Zaldibar antzokia
Zaldibar antzokiko bigarren faseko lanak Goitu enpresari esleitu zizkioten baita ere aho batez. Lau enpresa aurkeztu ziren lehiaketara eta irizpide teknikoak, enpleguaren sustapena, proposamen ekonomikoa eta hobekuntzak kontuan hartuta, Goituri esleitu dizkiote obra horiek. "Lehenengo fasean ere Goitu aritu zen, proiektua ondo ezagutzen du eta espero dugu lan ona egitea" esan zuen beñat Herce alkateak.
23 astez egingo dute lan, 6 hilabetez gutxi gorabehera eta esleipena 409 mila euro inguru gehi BEZ izango da, lizitazio prezioa baino "dezente baxuagoa", alkatearen esanetan.
Haur eskolako udal zerbitzua
Aho batez onartu zuten baita ere Arizmendiri esleitzea haur eskolako udal zerbitzuaren kudeaketa, azken lau urtetan bezala.
Deba bailarako Industrialdea
Deba Beheko industrialdea SA eta Debagoieneko industrialdea SA xurgapen bidez bategiteko proiektua ere izan zuten hizpide. Bildu proiektu horren kontra azaldu zen.
EAJko Aitor Urrutiak esan zuen gaia "hobeto aztertzea" nahiko lukeela, eta ondorioz, erabakia iraileko osoko bilkuran hartuko dute. Hala ere, osoko bilkuran hartutako erabaki horrek praktikan ez du eraginik izango.
Igor Ezpeleta, karguaren zain
Osokorako aurreikusita zegoen baita ere Igor Ezpeleta Bilduko hautagaiak, zinegotzi kargua hartzea. Izan ere, bere garaian Leire Urzelai zinegotziak karguari uko egin zion. Baina Madrildik oraindik erantzunik jaso ez dutenez, abuztuaren 1erako ez ohiko osoko bilkura deituko dute seguruenez Ezpeletari zinegotzi kargua emateko.