Eskoriatzako Olazar erretiratuen elkarteak 25 urte bete ditu eta urteurren hori ospatzeko egun osoko egitaraua antolatu dute domeka honetarako. Irudiotan juntako kide batzuk agertzen dira festako egun handirako azkeneko hitzorduak zehazten.
Egitarau zabala domekarako
Egitarau zabala prestatu dute domekarako; goizean meza ostean salda banatuko dute herritar guztien artean herriko plazan eta trikitilariak lagunduta joango dira handik kiroldegira, bazkaltzera. Omenaldirako tarterik ere izango dute. Batetik, Mertxe Galdosi lore sorta bat emango diote, Olazarko zuzendaritza taldean egon den zaharrenetakoa delako. Bestetik, Jose Rivierek, Debagoieneko erretiratuen izenean, plaka bat entregatuko die Olazarko egungo zuzendaritzako kideei. Eskoriatzako San Migel anaiek bertsotan egingo dute eta dantzaldia ere egongo da bazkaltzera joango diren guztiendako. Ondo pasatzeko asmoz joango dira erretiratuak.
Gaur egun 650 kide inguru daude elkartean eta horietatik 230ek eman dute izena, momentuz, domekako bazkarirako.
Ereserkia
25. urteurrena ospatzeko, egun osoko egitarauaz gain, ereserkia ere egin dute. Txomin Azpitarte, lehengo presidentea, hasi zen hori antolatzen. Horretarako, bi lagunei eskatu zien laguntza: Juan Carlos Irizar musikariari musika jartzeko, eta Amets Arzallus bertsolariari, letra idazteko. Domekan entzun ahal izango da estreinakoz abesbatzaren ahotsean.