Hiri hondakinen kudeaketari buruzko mozioan atez ateko sistema proposatu zuen atzoko ez ohiko bilkuran Bilduk, "dauden sistemen artean onena delako", Beñat Herce alkateak esan zuen bezala. Eta puntu horrek hartu zituen bi ordu eta laurden iraun zuen osokoaren minutu gehienak; EAJko eta Bilduko ordezkarien arteko eztabaida nagusitu zen. Zinegotziek banan banan eman zuten botoa: osokoan zeuden hamarretatik zazpik baiezkoa, eta hiruk, ezezkoa.
Atez atekoaren sistema bera 2013an martxan jartzea da asmoa, baina bitartean urratsak ematen jarraituko dutela adierazi zuen alkateak. "Autopostaiak, esaterako, erantzun ona izan du herrian eta hori landuko dugu. Lur eremurik ez duten herritarrei ere eman gura diegu laguntza autokonpostairako", azaldu zuen.