Ligan talde horien kontra jokatu dutenean Eskoriatzakoek denetariko emaitzak batu dituzte, eta ez dago jakiterik Lauko Finalerako erreferentzia moduan balio duten ala ez. Atleticoren kontra etxetik kanpo galdu egin zuten (49-32), eta etxean irabazi (48-38). Cafes Aitona ondo menderatu zuten ligan, etxean (52-38) eta kanpoan (53-54), eta Zarautz, berriz, gehiago izan da bi partiduetan. Hain zuzen, talde horren kontra jokatuko dute bihar lehenengo kanporaketa (16:00), eta 18:00etan jokatuko dute Atleticok eta Cafes Aitonak. Finala, ostera, domekan izango da (11:00).
Klubak autobusa jarri du zapatuan partidura joateko.