Partiduaren hasieran Krafft Atletico San Sebastianeko neskak etxekoak baino gehiago izan da. Kanpoko taldeak ez du meritu handirik egin, baina Eskoriatzak defentsan egindako akatsak aprobetxatzen jaki dute markagailuan aurreratzeko. Defentsan makal, erasoan ere ez dira eskoriatzarrak fin ibili, batez ere jaurtiketa asko huts egin dituztelako.
Lehenengo laurdenaren bukaeran, talde donostiarrak aurrea hartu du markagailuan eta bigarrenean ere, etxeko taldea baino gehiago izan da. Gauzak horrela, Eskoriatza 19-24 galtzen joan da atsedenaldira.
Atsedenaldian, Rasoren neskak partiduan zehar egindako akatsak identifikatzeko gai izan dira eta hirugarren laurden paregabea egin dute. Etenaldiaren aurretik sartzen ez zituzten jaurtiketak, saski barruan sartzen hasi dira eta defentsan egindako lan paregabeari esker partiduari buelta eman diote. Eskoriatza hiru minutuz egon da saskiratzerik jaso gabe.
Etxeko taldeak beste itxura bat eman du bigarren zatian eta partiduko azken laurdenean, hirugarrenean bezala, Donostiako taldea baino gehiago izan da. Partidua bukatzeko bi minutu falta zirenean, Eskoriatzak 12 puntuko aldea zuen; markagailuko aldea ikusita, eskoriatzarrek partiduaren tentsioa galdu dute eta kanpotarrek hiruko saskiratze bat lortu dute. Segidan, baloia gaizki atera, baloia galdu, eta beste bi puntu lortu ditu Krafft Atletico taldeak: bost puntu segundo gutxiren tartean. Bazirudien etxeko taldeak partiduaren azken minutuan sufritu egingo zuela, baina Eskoriatzak bi puntuko saskiratzea egitea nahikoa izan da talde donostiarra behera etortzeko; partidua noiz bukatuko zain geratu dira: 48-38 etxeko taldearentzat garaipena.