Eskoriatzako parrokoak, alkateak, hainbat zinegotzik eta Olazar erretiratuen elkarteko presidenteak osatzen dute Mesedetako Amaren Fundazioaren Patronoen Junta. Zaharren egoitzaren aurreko zuzendariaren kudeaketa txarraren ondorioz fundazioak 345.000 euroko zorra du egun, eta zor horri aurre egiteko martxan jarriko duten diru bilketa-kanpainaren berri eman dute goizean juntako kideek. Udalari, elizari, Diputazioari, Jaurlaritzari, herriko enpresa nagusiei eta herritarrei eskatuko diete dirua.
Ziur aski datorren astean saio informatibo bat ere egingo dute herritarrendako, egungo egoeraren eta kanpainaren gainean azalpenak emateko.
Aurreko zuzendariaren kudeaketa txarra ezagutu zenean Patronoen Juntak fundazioa udalaren laguntzarekin zuzenean berak kontrolatzeko erabakia hartu zuen. Diru-sarrerak gehitzea lortu dute ordutik eta gastu arrunta murrizteko neurri zorrotzak ere hartu dituzte. Honek egoera zertxobait arintzea ekarri du, baina ez konpontzea.
Ahal bezain bizkorren zorra kitatzea nahi du Juntak, eta baita egungo araudiak exijitzen dizkion derrigorrezko berritze lanak egiteko dirua lortzea ere. Hasteko, Gaztainadui kaletik egoitzara iristeko traba arkitektonikoak kendu nahi dituzte.
32 lagunendako lekua du Eskoriatzako zaharren egoitzak. Etorkizunean ere herrian zerbitzu hau izan dadin dirua ezinbestekoa dute orain.