Formatu akustikoan grabatutako hamar kantu berri jasotzen ditu lanak, baxu, perkusio intimista eta tarteka haize musika-tresnak ere bidelagun dituela. Istorio xumeak eta hurbilak kontatzen ditu horietan, egunerokotasuneko gogoetatik ateratakoak. Bada, Mikel Etxaburuk, Aitor Goenagak eta Kirmen Uribek lagundu dute zenbait kantutan.
Keu Agirretxea (Ondarroa, 1973) ez da geldirik egotekoa. Gitarra-jotzaile moduan ezagutu bagenuen ere, aspaldi hasi zen konposatzen eta egindako guztia jendaurrean erakusten. Uek izenpean lan instrumentalak lehenengo eta, talde izaera emanda, rocka geroago. Hori gutxi balitz, Keu Agirretxea izena erabilita formatu akustikoan ere ibiltzen da; Une akustikoak lanaren ostean, Denbora vs kantuak diskoarekin dator orain.