Sarrerak banatzeko metodoa iazkoa izango da; hala erabaki dute Udalak eta gurasoen elkarteak: Eskoriatzako bi ikastetxeetako Haur Hezkuntzako eta Lehen Hezkuntzako 6. mailara arteko ikasleen artean banatuko dituzte. Ikasle bakoitzak gehienez bi sarrera eskatu ahalko ditu eta horretarako espreski prestatutako plantila bete eta dirua entregatu beharko dute. Bide horretatik sarrera lortzeko azken eguna da azaroaren 12a.
Soberan geratzen diren sarrerak, bestalde, azaroaren 17an jarriko dituzte salgai. Kiroldegian jarriko dira, goizeko lehen ordutik: 08:00etatik aurrera. Sarrerak bost eurotan jarriko dituzte salgai.
Ikuskizunaren aurkezpena, Eskoriatzan
Pupu eta Lore Pirritxen bi alaba bikiak dira, eta jakina, alabak hezi egin behar dituzte, horrek dakartzan arazo eta bestelako buruhausteekin. Adibidez, osasun kontuek berebiziko garrantzia dute, eta bide horretan laguntzeko azalduko da Nagore, euren lagun medikua.
80 minutuko saioa da Euskal Herriko pailazo ezagunenek Eskoriatzan aurkeztuko dutena.