Aurtengo ibilbidea berezia izango dela azaldu dute antolatzaileek. Hamabi eguneko udalekuari uztailaren 6an Garaion emango diote hasiera, Otazako etxean. Bi egun pasako dituzte han. Jarraian, Gatzagara joango dira eta bertan lo egin ostean, hurrengo egunean Anboto mendiaren ingurunerantz abiatuko dira.
Uztailaren 10ean, Matienarantz jaisten diren bitartean, bidean eskalada egiteko aukera izango dute, Atxarte inguruan. Gainontzeko egunak, uztailaren 11tik 17ra bitartean, kostaldean igaroko dituzte. Lehenengo bi egunetan Laidako kanpinean hartuko dute ostatu gazteek; eta uztailaren 13an, Mundakara mugituko dira.
Hurrengo egunean Gaztelugatxera iritsiko dira eta gaua bertan igarotzeko asmoa dute antolatzaileek. Azken egunak Bermeoko aterpetxean egingo dituzte.