Astelehenetik barikura bitartean egindako berbaldiak interesgarriak izan zirela eta zapatuko jaialdiak oso harrera ona izan zuela azpimarratu dute. Horrekin batera iragarri dute, datorren urtean, VII. Aste Zapatista antolatuko dutela.
120 lagun bazkaltzen
Zapatuan, esan bezala, amaiera borobila eman zioten horri urtero antolatzen duten jaialdiarekin. Ekimenak eguerdian hasi baziren ere, ordurako hamar bat emakumez osatutako lantaldea orduak zeramatzan herri bazkarirako jakiak prestatzen. Besteak beste, guakamole tostadak, patata-zatiak, barazki erreak eta saiheskia dastatu zuten udaletxeko arkupetan bildu ziren 120 lagun inguruk. Bazkaria behar bezala amaitzeko, gainera, arto-natillak, Txiapaseko kafea eta mojitoak izan zituzten.
Zuzeneko musika
Bazkaria iraun zuen bitartean, argentinar batek zuzeneko musika eskaini zuen eta bazkalostean, berriz, Costa Ricaco lagun batek hartu zuen tokia.
Kontzertuak hasi aurretik, bazkarian zehar saldutako errifen zozketa egin zen. Txiapaseko produktuekin egindako saskia eraman zuen irabazleak. Jarraian, musika protagonista bilakatu zen herriko tabernetan.