Ekimena euskara ahoan duten gazte koadrilendako antolatu du Udaleko Kultura Sailak, eta koadrila bakoitzak hiru esaldi aurkeztu behar izan ditu gutxienez eta bost gehienez.
Lehiaketa herrian errotu dela ez dago zalantzarik; 72 esaldi jaso dituzte, kopuru bereziki aipagarria da. Izan ere, iaz lehiaketak hamar urte bete zituen eta orduan aurreko bederatzi urteetan esaldi irabazleen artean gustukoena aukeratu zuen epaimahaiak. Hortaz, ez zen herritarren parte-hartzerik izan.
Aurten lehiaketaren betiko formatura itzuli dira. Hori horrela, Mari Carmen Arrieta euskara teknikariak azaldu duenez, beldur zen Udala parte-hartzea baxua izan zitekeelako: "Uste genuen herritar asko ez zirela akordatuko, baina parte-hartzea espero baino altuagoa izan da". Irabazleendako saria da herriko jatetxe baten afaria, jaiek iraun artean. Irabazleek aukeratuko dute jatetxea.
Pegatinetarako esaldiak
Esaldi irabazlea, urtero moduan, Kultur etxeko balkoian egongo da jaiek iraun artean. Eta esaldi horrez gain, beste bi esaldirekin egingo dituzte pegatinak. Bi proposamen hauek aukeratu ditu epaimahaiak: Astien ziher festa, asteburuen siesta eta Ez hadi gera begira, pasa hadi harira.